L’isula

Salvatore Vicari

magma@analisiqualitativa.com

Ragusa (Italia). Prima opera classificata nella sezione Poesie L’isola di lingua siciliana della sesta edizione del premio internazionale Thrinakìa.

Bernardo Carollo

magma@analisiqualitativa.com

Trapani (Italia). Seconda opera classificata nella sezione Poesie L’isola di lingua siciliana della sesta edizione del premio internazionale Thrinakìa.

Vincenzo Ricciardi

magma@analisiqualitativa.com

Roma (Italia). Terza opera classificata nella sezione Poesie L’isola di lingua siciliana della sesta edizione del premio internazionale Thrinakìa.

Riccardo Ravegnani, Istituto I.S.I.S.S. Einaudi – Molari di Rimini - Sezione speciale L’isola Thrinakìa. AMIS Archivio della Memoria e dell’Immaginario Siciliano, Le Stelle in Tasca ODV.

L’isula

Salvatore Vicari

…a-ttia ca passi, sthranieru – ri ccà : r’unni vieni ?

certu rô mari !  o rô cielu ?

ma ri sta sthrata ca ti viru sulu sulu

quo vadis ? ri ccà : aspetta parramu :

ri chista Terra ri l’erbi rê pethri sapuri ri sali

rê gghienti ca viri, amicu, dimmi, ri ccà cchi ni sai ?

Iu ti ricu : è la mia : niru ràrica e çiuri – e na stu rricu

cci scrivu :è Mathri ! a cciù bbedha !

e ri fintu pueta cantu – ri stu Pajisi…la maggìa

parpitiu ri cori “la mia chitarra in mano”

çiatu ri l’arma la mia vuci …l’incantu :

è u liuni r’austu : l’uocciu r’oru ca percia “un raggio di sole “

è la rosa ri majiu : cruna r’argentu  “la tintarella di luna“ e gghiè

a pirnichella : cu cci piaci a-ll’ùmm’ra – na menzura ri paci.

E ssi rapi u sipariu :apprausi ! rô sthrittu ê thri ppizza

e sse ri fumu a li cela rô Munti traspari la vela – cci criru

ca èni varca ri mari e ri ssa gghiènti ca veni turisti…a-ttaliari

maravìgghia ri seculi ! fileri ri pethri cuticci scippati

viva carni ri timpa – ciantati a-ssiccu nệ çjiai pirtusa – sti mura.

Iu ora mi susu – lassu a pinna e cci vàjiu …ca putissi

a-ccùrri-ri e ssautari – ri tannu picciuttiedhu – cci pienzu 

e ancora ogghi – gghià stizziatu r’argentu – cci tuornu

ss’erba circannu – aruci amara ciamata paci…e sse tti piaci

nê jiola unni fu ppi mmia u natali … viènnicci…ccu-mmia

e ppò-ssiri ca cci thruovi na zita – ri ccà – ri sali cunzata e ri suli

ardhenti r’amuri…pittignola ca bballa ccû ‘m peri …e…r’unni passi

passu passu – viri tocca carizza sti pethri : tu – una rui …n’athra !

sthraviati ri çiana – e ppàrricci ! ca ti sièntunu – criaturi cu èrunu

ca sunu : i manu i pieri rê viddhani…cristi ccô tascu…figghi

rattànnicci a stientu a campata – ciamànnila vita… e ssunu

u sangu russu ri ddhi milli cammisi vinuti rộ mari ciamànnila patria!

Sunu u cori rê surdhati – mannati a la guerra conthr’ê frati

turnati eroi – vistuti ri lignu – a la pena a la pietà ciamata mathri

e ssunu l’armi rê so suoru :piatusi priannu ca tòrnunu – ciamàta spranza.

Tu !…e ora iu – se attientu – vutatu a la Luci :sientu vuci…viru  

ri ddhi tempa i pathri i nanni ca tòrnunu a ssiminari e rricògghi-ri

a ccunzari mura muràgghia thrazzeri…e rrìrunu e càntunu !

canzuna e ssona ! r'allicrizza o ppi rràgghia ‘n-còru ê so figghi e i nipùti 

çiatu sangu ri chista Terra nosthra Sicilia r'amuri

ca “sarà bbillissima“ màggica stasciuni ri suli ri cielu ri mariMa ri sti tempa – ‘n zia mai ! se l’incanto veni ca si stuta

si sia la puisia e il canto ca ni salva l’amuri ri Mathri…’nca se la sorti

ri la gghiènti ca veni cci cancia culura – mathrigna è la terra

e na-ll’urtimu rricu è scrittu : è Morti ! fuorsi pethri-cuticci ri mari ?

no! frati suoru figghi niputi ! – ciamati micranti – amicu siènti-li 

risiusi : “hellò ! good ! salam ! “ ri libirtà-ti  e nui…ri finti mafiusi

 “vossia thrasi…bbinirica…se ddhiu voli…vasamu li manu !”

L’isula

Bernardo Carollo

Sta perla ‘nmenzu l’acqua di lu mari

è na stidda a tri punti, na paranza,

è  tettu d’un gran celu chi nun cari,

acqua surgiva e suli ad abbunnanza.

E la taliata un s’àvi a scannaliari

si ccà ogni ciatu v’inchi cori e panza,

sì da li spunni d’oru a cuminciari

tra li luci pittati e na valanza

pisati sti biddizzi chi abbramati

mentri nna l’unni na vuci vi chiama,

e ‘ntra na sbrizza poi vi zammatiati

si un gran tizzuni all’arba ddà vi ‘ntama.

E tra muntagni, chiani e li vaddati

lu megghiu strattu l’occhiu l’arricama,

tra ciuri e nna ddu beddu v’arrancati

circannu  manna duci nna ogni rama.

Nna sta gran terra d’omini ‘mpurtanti

truvati ccà l’amuri chi ‘nnistati,

l’ogghiu e lu vinu, àrvulì e diamanti,

e un vurcanu tra nùvuli annigghiati.

‘Nzamai nun li ciatiati tutti quanti

sti gran prufumi libberi d’estati,

avìti scantu chi comu n’amanti

vasu ‘ntra vasu làssanu affamati.

E tra fastuchi, munti e li varcuzzi

sbrizzi di sali abbrazzanu li scogghi,

‘ncapu ciuri di mènnuli e l’apuzzi

si sbattulìa l’arma e poi si sciogghi.

Sicilia chi tra nèspuli e cucuzzi

nni lìi nna l’occhi lu megghiu chi cogghi,

tu dintra la vuccuzza quannu appuzzi

tramuti mari, celu, terra e fogghi.

L’isula

Vincenzo Ricciardi

annotta, agghiorna

brisci, scura

ghiovi, scampa

e sempri e sempri

stiddi e diavuli

pici e stuppa

stu mari manciaterra

stu sapuri di ferru, di fèli

stu sali ‘nto pettu

isula, isula

unni sì sempri vivu e sempri mortu

campamu cu i fantasimi

arredi u muru videmu

l’aria di prima

sutta u cimentu sentemu

a terra i prima

avant’o specchiu ‘nta facci

nni cumparunu centu

e nui stissi semu fantasimi

p’i nui stissi, u nomi è n’ autru

a vuci non è chidda, ‘i cu sunnu

sti occhi?

Oh picciridda, pupitta di zuccaru

ca  papà mi ghiami e mi carizzi

e non vidi ancora

comu intra aju

l’ossa di chiddi prima ‘i mia

comu stu cori camina

cu lu ciatu di iddi

pi chistu, giuvàu u me cori

p’allegrari

pi scurdari e perdunari

cu fummu, cu avemu statu

nta quali autri un pocu

buscammu abbentu.